Dili, 01-07-2024, Sua Exelénsia Primeiru-Ministru, Kay Rala Xanana Gusmão ohin sai lnspetór ba Isár Bandeira ba loron dahuluk iha fulan Jullu tinan 2024 iha Resintu Palásiu Governu, Díli Timor-Leste.

Sua Exelénsia Primeiru-Ministru iha diskursu informa katak, ohin loron 1 fulan Jullu, IX Governu hahú ninia knaar tinan ida ona tanba ne’e nia husu ba funsionáriu/a sira hotu hahú hakaas aan atu kumpri programa IX Governu nian.

Sua Exelénsia Primeiru-Ministru apela ba funsionáriu/a sira hotu atu halo reflesaun ba servisu sira ne’ebé halo ona durante tinan ida no presiza hadi’a saida mak atu hadi’a.

“Husu ba Kargu Diretores, Xefia no Funsiunáriu/a sira atu servisu maka'as ba Rai ida-ne’e no ba Povu ida-ne’e, ne’e duni tinan ida ita tenke halo reflesaun ida-idak iha imi-nia Seksaun, iha imi-nia Diresaun, iha imi-nia Ministériu halo reflesaun tinan ida halo ona saida, tinan ida imi hadi'a aan ga la’e, tanba funsionalizmu públiku la'ós fali oportunidade atu fó empregu”, Sua Exelénsia Kay Rala Xanana Gusmão haktuir..

“IX Governu Konstitusionál ninian Membrus Governu, Instituisoins hotu-hotu, to’o Funsiunáriu/a tenke halo reflesaun kona-ba kompromisu ne’ebé ita hotu hasai atu hadi’a, atu kurize no hametin Estadu ida-ne’e. Komisaun Funsaun Públika servisu daudauk atu halo reforma ida iha buat hotu-hotu ne’ebé kona-ba funsionalizmu públiku, hanoin kapaas tebtebes Konsellu Ministru sei diskute ida-ne’e atu taka dalan, bolu malu lahatene buat ida sa’e ba iha ne’ebá, hatene tiha ida-ne’e ba fali iha ne’eba tanba manán osan barak liu, hatene tiha ona no servisu di'ak tiha ona iha ne’e”.

Sua Exelénsia Primeiru-Ministru nafatin husu ba funsiunáriu/a sira, liuliu funsionáiru/a permanente sira katak membru Governu bele muda tinan-tinan maibé funsionáriu/a permanente sira sei hela, tanba ne’e tenke defende liu Estadu.

Isár Bandeira ba fulan Jullu ida-ne’e partisipa husi Sua Exelénsia Vise Primeiru-Ministru no Ministru Koordenadór Asuntu Sosiais no Ministru Dezenvolvimentu Rurál no Abitasaun Komunitária, Eng. Mariano Asanami Sabino; S.E. Ministru Prezidénsia Konsellu Ministrus, Sr. Agio Pereira; S.E. Vise Ministru Asuntu Parlamentares, Sr. Adérito Hugo da Costa; S.E. Sekretária Estadu ba Igualdade, Sra. Elvina Sousa Carvalho; S.E. Sekretáriu Estadu Komunikasaun Sosiál, Sr. Expedito Dias Ximenes; Prezidente Komisaun Funsaun Públiku; Diretór-Ezekutivu CNC; Diretór-Ezekutivu Muzéu Rezisténsia; Diretór-Jerais; Xefe-Gabinete; Instituisaun Defeza no Seguransa (F-FDTL no PNTL) no Funsionáriu/a Públiku husi Gabinete PM, Vise PM, Vise Ministru Asuntu Parlamentares, SEI, SEKOMS, CNC, KFP, Muzéu Rezisténsia no seluseluk tan.

#Média SEI#