Bangkok, 3-4 jullu 2024__ Diretora Nasionál Relasaun-Públika no Média, Sra. Maria Filomena Babo Martins, ho akompaña Asesora Polítika Jéneru no Asuntu ASEAN, Sra. Santina Soares, reprezenta Sekretaria Estadu ba Igualdade-SEI partisipa iha Enkontru Grupu Péritu kona-ba Relatóriu Síntenze Rejiaun Ázia-Pasífiku nian ba Pequim +30 ne’ebé realiza iha loron 3-4 fulan-jullu iha UN ESCAP Rejionál, Bangkok-Tailándia.

Iha tinan 2025, komunidade globál sei marka aniversária Konferénsia Mundiál ba Dahaat kona-ba Feto no Adosaun Deklarasaun Pequim no Plataforma Asaun iha tinan 1995 no tinan sanulu ba Ajenda 2030 kona-ba Objetivu Dezenvolvimentu Sustentável. Iha aniversáriu ba dala 30 ida-ne’e nasaun sira inklui Timor-Leste hala’o ona revizaun nível nasionál ba implementasaun Deklarasaun Pequim no Plataforma Asaun iha área preokupasaun krítiku sanulu-resin-rua.

Hafoin nasaun sira haruka sira-nia relatóriu ba UN ESCAP, estabelese ekipa ne’ebé mak prepara ona Relatóriu Sínteze ba Rejiaun Ázia-Pasifiku. Relatóriu Sínteze ida-ne’e hanesan sumáriu hosi progresu ba saida mak nasaun sira halo ona hahú iha tinan 1995 no dezafiu saida mak hasoru inklui estratéjia no asaun sira atu ultrapasa no hadi’ak liután iha futuru hodi aselera realiazaun igualdade jéneru no empoderamentu ba feto no labarik-feto iha área hotu-hotu. Nune’e enkontru Grupu Péritu ida-ne’e realiza atu lori péritu sira hosi nasaun sira iha Ázia Pasifiku nian ne’ebé lidera no envolve diretamente iha halo peskiza no hakerek relatóriu nian hodi reve no fó hanoin hodi hadi’ak di’ak liután relatóriu sínteze ne’ebé mak ekipa prepara ona.

SEI nia partisipasaun iha enkontru ida-ne’e mós atu lídera diskusaun no fornese komentáriu ba iha relatóriu liuliu iha Kapítulu 3 kona-ba Prosperiedade no Servisu Dignu, Kapítlu 4: Livre hosi Violénsia, Estigma, no Esteréotipu, Kapitulu 6: Dame no Sosiedade Inkluzivu no Kapitulu 8: Dalan ba Oin.

Iha relatóriu Sínteze ÁZia-Pasifiku nian emfaze katak nasaun sira halo ona progresu hafoin tinan adosaun Deklarasaun Pequim no Plataforma Asaun iha tinan 1995 maibé seidauk atinje objetivu Pequim nian. Maibé nasaun sira kontinua halo esforsu hodi halo di’ak liután hodi proativamente envolve feto no parseiru sira hotu iha esforsu ida-ne’e.

#Média SEI#